Një varr i paprekur i një gruaje të re nga fillimi i shekullit të II-të u zbulua nga arkeologët pranë fshatit Kapitan Petko Vojvoda (Bulgaria Jugore), njoftoi Bashkia e Topollovgradit. Ekipi që bëri zbulimin drejtohet nga Daniella Agre dhe Dejan Diçev.

Sipas arkeologëve, varrimi u krye sipas ritualit të kremacionit dhe trupi u vendos në një shtrat të veçantë prej druri në një dhomë varrimi me tulla, të mbuluar me një qemer tullash. Vathë masivë prej ari, aplikime gjysmësferike prej ari në zonën e kokës dhe një broshë prej ari janë ndër gjetjet e zbuluara.

Brosha – me një imazh femëror në reliev, dallohet për elegancën e saj të jashtëzakonshme dhe është unike në vendin tonë. Një bizhuteri e ngjashme njihet nga varrimi i Kriperia Trifenës në Romë, i cili flet për statusin e lartë shoqëror të gruas së varrosur, informon Bashkia e Topollovgradit.

Artefaktet e tjera janë një tavolinë bronzi me këmbë në formën e sirenave mitike – një gjetje jashtëzakonisht e rrallë për territorin e Perandorisë Romake, një arkë tualeti, enë qelqi dhe qeramike, një furkë kocke dhe këpucë lëkure. Një monedhë bronzi e Perandorit Trajan (98–117 pas Krishtit) u gjet gjithashtu në zonën e kokës, e ashtuquajtura “Obol i Karonit”, e lënë, sipas besimeve, për t'i paguar shpirti i të ndjerit varkëtarit Karon për kalimin në jetën e përtejme.

Verën e kaluar, në zonën e Kapiten Petko Vojvodës, gjatë gërmimeve të varrit të një kalorësi trak nga trupat e Perandorisë Romake, u zbulua një thesar i artë, ndërsa në fillim të gushtit të këtij viti - një varr i dytë i një luftëtari aristokrat së bashku me dhurata, një pjesë të armatimit të tij dhe kalin e tij të kalërimit nga gjysma e dytë e shekullit të II-të, kujton BTA.

• Arkeologët kanë zbuluar një varrim të pasur të një luftëtari trak të epokës romake

Redaktoi: Diana Cankova

Përgatiti në shqip dhe publikoi: Vesella Mançeva

Foto: Bashkia e Topollovgradit