“Krijuesi i vitit” shpërblen mjeshtrit dhe zejtarët më të mirë bullgarë

Ekspozita shfaq edhe punimet e finalistëve

botuar më 25-11-04 8.00.MD

Foto: Desisllava Semkovska

Më 8 nëntor, në orën 19:00, në Sallën 11 të Pallatit Kombëtar të Kulturës, për herë të tretë do të shpërblehen mjeshtrit dhe zejtarët më të mirë të Bullgarisë. Krijues dhe frymëzues i nismës “Krijuesi i vitit” është Nikollaj Trajkov, i cili ishte i ftuar në studion e “Radio Bullgarisë” së bashku me dr. Bistra Pisançeva, anëtare e jurisë, dhe mysafirin special – interpretuesin Dimitër Georgiev.

“Gjithmonë kam dashur të krijoj produkte që të jenë të dobishme për komunitetin krijues, përmes të cilave ai të rritet, të bëhet i njohur dhe më i bashkuar. Ndërsa ëndrra për një ngjarje të rëndësishme kulturore, kushtuar krijimtarisë me dorë dhe krijuesve e zejtarëve bullgarë – ruajtësve të identitetit tonë kombëtar, u bë realitet me shumë punë dhe këmbëngulje”, ndau Nikollaj.

“Në pamje të parë konkursi duket si garë, por e gjithë ideja është që krijuesit të sfidohen të tejkalojnë veten. Unë nuk jam krijues, por jam pjesë e komunitetit të krijuesve dhe adhuruesve të krijimtarisë me dorë. Pa adhuruesit, krijuesit nuk mund të ekzistojnë. Ata mund të krijojnë për kënaqësi, por nxitje është kur vlerësohen. Kjo është më e rëndësishmja”, është i bindur bashkëbiseduesi ynë.

Veprat vlerësohen nga profesionistë të shquar në fusha të ndryshme të artit dhe zejeve, në bazë të origjinalitetit, mjeshtërisë dhe ndikimit emocional. Çmimet do të jepen në disa kategori – “Kreativitet”, “Detajshmëria e punimit”, “Kombinimi i ngjyrave”, “Nga asgjëja diçka”, “Ekstravaganca” dhe “Bashkimi krijues”. Çmimi i madh “Krijuesi i vitit” do t’i jepet krijuesit, vepra e të cilit ka mbledhur numrin më të lartë të pikëve nga të gjitha kategoritë. Jurinë eksperte e pret detyra e vështirë të zgjedhë më të mirët nga më të mirët:

“Oh, kjo vërtet është shumë e vështirë! – thotë dr. Bistra Pisançeva. – Nga njëra anë është shumë interesante të shohësh kaq shumë produkte të ndryshme në kategori të ndryshme dhe, në të njëjtën kohë, ato duhet të plotësojnë kritere të caktuara. Si krijuese, e kuptoj sa e vështirë është të punosh me orë të tëra dhe më pas vepra të dalë nga duart e tua dhe të shkojë para syve ose të blerësve, ose të publikut, ose të një jurie të rreptë. Kështu që për mua ishte shumë e vështirë të përzgjidhja atë që meriton të vazhdojë.

Këtë vit, për herë të parë, tetë krijues do të përgatisin tetë çmimet, duke paraqitur interpretimin e tyre personal të logos së konkursit. Kështu secili prej tyre do të marrë vëmendjen e merituar, ndërsa fituesit do të mbajnë në duar një vepër unike arti që mban shpirtin e krijuesit të saj.

Statuja e parë, simbol i çmimit të madh, e punuar nga mjeshtri Georgi Kojçev, qyteti i Varnës

“Krijuesit janë zgjedhur sipas vëzhgimeve të mia. Mendoj se mund të përballen me detyrën dhe sipas meje është shumë interesante që një krijues t’i japë çmim një krijuesi tjetër. Ky është një gjest shumë i bukur mirënjohjeje dhe respekti – të krijosh diçka për një kolegun tënd”, mendon Nikollaj.

Për herë të parë në historinë e Konkursit Kombëtar “Krijuesi i vitit”, në ART Gallery Adriana, në qendër të Sofjes, do të ketë edhe një ekspozitë të veprave finale, e cila do të vazhdojë deri më 7 nëntor, në mënyrë që më shumë njerëz të mund të bëhen dëshmitarë të magjisë së krijimtarisë me dorë. Në ceremoninë solemne në PNK, me votim do të zgjidhet edhe krijuesi që do të marrë çmimin special të publikut.

Dhe për humorin e mirë në sallë do të kujdesen muzikantë dhe interpretues të rinj, ndër të cilët është edhe këngëtari 13-vjeçar Dimitër Georgiev. Të këndojë në një ngjarje kaq të madhe është një tjetër njohje për talentin e tij – ai është fitues i shumëfishtë në konkurse muzikore në Bullgari, Maltë, Itali, Rumani, Serbi...

“Publiku do të kënaqet me një nga interpretimet e mia më të dashura të një këngëtareje të madhe – Beyonce. Do të këndoj një këngë shumë të bukur të saj – Listen”, ndan i riu i talentuar.

Hapat e parë në muzikë Dimitër i ka bërë te e madhja Mimi Ivanova, dhe prej dy vitesh merr pjesë edhe në muzikalin “Joan – biri i bubullimës”, ku luan rolin e të voglit Joan. Djaloshi ka dëgjim absolut:

“Kjo do të thotë se unë mund të dëgjoj tingujt dhe t’i përcaktoj pa ndihmë nga dikush tjetër. Ka edhe të meta, sepse ndonjëherë kjo mund të shqetësojë veshin në zhurmën më të vogël, por më ndihmon me këngët dhe për të gjetur akordet në piano, në të cilën luaj. Synoj të bëhem këngëtar i madh. Mendoj të këndoj në shumë skena të mëdha, në ngjarje të mëdha. Dua që njerëzit ta dinë emrin tim dhe kush është Dimitër Georgiev!”, ndan ëndrrën e tij ai.

Nikollaj Trajkov është krijues edhe i projektit “Duart e arta të Bullgarisë” me më shumë se 50 video.

“Ideja është të xhirohen krijuesit dhe zejtarët bullgarë në mjedisin e tyre autentik, që brenda rreth 3 minutash të tregohet një histori tërheqëse për jetën e tyre, të njihen njerëzit me thelbin e tyre, të kuptojnë çfarë është krijimtaria me dorë. Ajo është pjesë e identitetit tonë kulturor kombëtar, sepse zejet janë një nga gjërat më të çmuara që duhen ruajtur dhe mbajtur.”

“Ejani në ‘Krijuesi i vitit’! Kjo është një ngjarje jashtëzakonisht pozitive, ku njerëzit bëhen një e tërë. Largohen si miq dhe mbushen me emocione pozitive. Dhe mos harroni që krijimtaria me dorë është pjesë e rrënjëve tona mijëvjeçare, prandaj mbështesni krijimtarinë me dorë!”, ftoi në fund të bisedës sonë Nikollaj Trajkov.