Rrugën e saj drejt Austrisë bullgarja e nis para 29 vjetësh, e pushtuar nga aventurizmi:

“Studioja psikologji në universitetin e Salzburgut, pas së cilit u shpërngula në Vjenë, sepse vlerësova se do të mund të bëja shumë më tepër gjëra dhe të isha shumë më aktive në një qytet shumë më të madh, ku tashmë jetoj prej 25 vjetësh.”

Në vitin 2008, Nina është ndër themelueset e një qendre konsulence dhe integrimi në Vjenë, e drejtuar drejt qytetarëve të rinj evropianë, siç ishin atëherë bullgarët dhe rumunët. Ajo e drejtoi atë për 14 vjet, dhe megjithëse sot qendra nuk ekziston më, ajo vazhdon punën e saj në ndihmë të bashkatdhetarëve që i drejtohen asaj:

“Unë jam konsulente biznesi dhe jam pjesë e grupit të konsulentëve pranë Dhomës Ekonomike – Vjenë. Kështu që puna ime mbetet dhe unë vazhdoj ta bëj atë me bullgarë që kanë qëllim të vendosen përherë ose të zhvillojnë biznesin e tyre. Aktualisht, prirja është që shumë të rinj të mbërrijnë në Austri për t’u shkolluar dhe për të krijuar biznesin e tyre atje, pasi ata kanë vetëbesimin e qytetarëve evropianë. Ata e dinë që nuk po ikin nga Bullgaria dhe se do të kthehen atje një ditë, duke pasur mundësinë të jetojnë kudo në botë.”

Bashkatdhetarja jonë është pjesë e ekipit të angazhuar edhe me një tjetër veprimtari që ushqen dashurinë për Bullgarinë – emisioni i vetëm bullgar që transmetohet në radion austriake:

“Emisioni quhet ‘Ne, bullgarët’. Tema e kësaj një ore bullgare është e ndryshme. Ne përqendrohemi tek një i ftuar i rëndësishëm, që ka arsye për të qenë i ftuar, dhe më pas ndajmë informacione për ngjarje interesante që zhvillohen në vend, por edhe në Bullgari. Gjithçka e shoqërojmë me reportazhe të shkurtra për tema të ndryshme.”

Nuk është e detyrueshme që të ftuarit në emision të jenë vetëm bullgarë që jetojnë në Austri. Ata mund të jenë nga çdo cep i botës, mjafton që ajo që kanë bërë ose planifikojnë të bëjnë të ketë lidhje me bullgarët në Austri – sqaron znj. Zaneshev.

Ideja për krijimin e këtij emisioni të vetëm mujor bullgar në radion austriake është e bashkatdhetarit tonë Ivan Karçev, i cili ishte frymëzuesi dhe organizatori i një sërë ngjarjesh, projektesh mediatike dhe iniciativash të drejtuara drejt bullgarëve në Austri. Në kujtim të tij, Nina vendos të vazhdojë veprën e tij dhe të mos lejojë që ky orar bullgar të zhduket. Ajo pranon se sot është e kënaqur, sepse emisioni funksionon, informon dhe forcon krenarinë kombëtare të bullgarëve në vend, të cilët mund të dëgjojnë një transmetim radiofonik bullgar në valët austriake një herë në muaj.

Me stilin e saj karakteristik dhe entuziazmin frymëzues, Nina Zaneshev arriti të organizojë grupin e këngëtareve për vetëm njëzet ditë dhe të impresionojë si publikun, ashtu edhe muzikantët profesionistë, duke fituar medalje argjendi në Festivalin Botëror të Korit për Paqe në Vjenë:

“Mblodha gra që janë nëna dhe gjyshe, të ardhura për t’u kujdesur për fëmijët dhe nipërit e tyre, të cilat megjithatë kanë kënduar në familjet e tyre dhe kanë trashëguar aftësi nga paraardhësit e tyre. U mbështeta në zërat e tyre autentikë dhe i nxorra në skenën e ‘Musikverein’. Kjo ndodhi para dy vjetësh dhe mendoj se do të vazhdojë të jetë një tendencë, sepse nga momenti që dolëm në skenën e madhe, ne u bëmë një kor jashtëzakonisht i kërkuar dhe i respektuar. Gratë japin gjithçka nga vetja për të arritur cilësi që të na mundësojë të ftohemi në skenat e mëdha. Ne punojmë midis tre dhe katër orë çdo ditë për ta mbajtur këtë nivel dhe shpresoj të vazhdojmë kështu.”

Motivimi nuk e ka lënë asnjëherë gjatë gjithë këtyre viteve: “Kauza është kauzë, thirrja është thirrje dhe duhet ndjekur në çdo mënyrë!” – është e bindur bullgarja, e cila nuk ndalet së punuari për të gjetur bashkëmendimtarë, për të bashkuar dhe për të kontribuar për dukshmërinë dhe jetën më të mirë të bashkatdhetarëve tanë në Austri.