Kompania bullgare “Toplivo - 2” apelon zgjedhjen e furnizuesit të tubave për interkonektorin e gazit ndërmjet Bullgarisë dhe Greqisë. Ankesa është parashtruar para Komisionit për Mbrojtjen e Konkurrencës dhe është kundër kompanisë bullgaro-italiane-greke ICGB, e cila po ndërton lidhjen e gazit. Ankesa është paraqitur vetëm një ditë para se kryeministrat e Bullgarisë dhe Greqisë Bojko Borisov dhe Aleksis Tsipras të shpallin zyrtarisht fillimin e ndërtimit. “Toplivo-2” ishte një nga ofertuesit në ankandin për furnizimin e tubave, por doli nga skema e konkurrimit për shkak të mangësive në dokumentacionin e paraqitur. Kompania insiston se ankandi nuk është zhvilluar sipas rregullave dhe se çmimi i ofruar prej saj ka qenë më e mirë, por nuk u dha mediave më shumë hollësi.