Forumi i pare akademik “Japonia dhe Evropa Juglindore” mblodhi në Sofje emra të mëdhenj të bullgaristikës dhe ballkanistikës japoneze me kolegët e tyre bullgarë. Konferenca është kulmi i ngjarjeve të lidhura me Ditët e Kulturës Japoneze në Bullgari, të cilat zhvillohen për vitin e 30-të me radhë. Përveç kësaj sivjet shënojmë dhe përvjetorin e 110-të të marrëdhënieve diplomatike (1909) ndërmjet të dyja vendeve.

Theksi i punës së konferencës është rruga historike, gjendja bashkëkohore dhe perspektivat para japonistikës në Bullgari. Në një intervistë për Radion Kombëtare Bullgare Shkëlqesia e Tij Masato Vatanabe – ambasadori i Japonisë në Sofje, tha se shkolla bullgare e japonistikës është ndër më të mirat në botë. Para 110 vjetëve stërgjyshi i Perandorit japonez Naruhito – Princi Kuni Kunijoshi, ka ardhur në Sofje, ku është pritur nga Mbreti bullgar Ferdinad. Që atëherë deri më sot, pavarësisht nga rrethanat e ndryshme politike dhe shoqërore Sofja dhe Tokio mbajnë marrëdhënie sa më të mira.

Në vitet e tranzicionit të Bullgarisë nga komunizmi në ekonomi tregtare dhe demokraci Japonia i siguroi popullit bullgar mbështetje të fortë financiare. Shteti ynë është i njohur mirë në Japoni me trëndafilin e vet dhe me kosin, me muzikën dhe sukseset e sportistëve bullgarë.