Një shkollë në Sofje po aplikon një strategji kurioze për të ndihmuar nxënësit të përshtaten me mjedisin shkollor pas dy viteve të vështira të pandemisë Covid-19. Katër qen të birësuar - Tulip, Alma, Mario dhe Jack, i kënaqën fëmijët në shkollën “Car Simeon” në rajonin Bankja dhe zgjuan emocione pozitive në zemrat e tyre.

Takime të tilla do të kenë një ndikim pozitiv në rezultatet e fëmijëve gjatë orës së mësimit. Një nga vizitat e ardhshme të planifikuara të “qenve të terapisë” do të jetë me theks të veçantë në ndërveprimin e tyre me fëmijët me nevoja të veçanta arsimore.

Më 15 dhe 16 prill do të zhvillohet një Pazar i Bamirësisë me rastin e Pashkëve. Mjetet e mbledhura gjatë iniciativës do t'i dhurohen organizatës joqeveritare "Banda e viteve 1500", e cila prej 6 vitesh po përpiqet të ndryshojë jetën e miqve të tyre katërkëmbësh nga strehimoret në Sesllavci, Gorni Bogrov dhe Sllatina. Falë tyre, tashmë më shumë se 1500 kafshë kanë gjetur shtëpinë e tyre të re.

Përpiloi: Joan Kolev

Përgatiti në shqip: Vesella Mançeva