Presidenti bullgar Rumen Radev u takua me Shefin e Zyrës për Koordinimin e Sanksioneve në Departamentin Amerikan të Shtetit, ambasadori Jim O'Brien, i cili është për vizitë në Sofje nga 30 deri më 31 gusht. Në takim u diskutua për zgjedhjet e ardhshme parlamentare, zhvillimin e kuadrit legjislativ për zbatimin e Planit të Rimëkëmbjes dhe Qëndrueshmërisë, pranimin e Bullgarisë në zonën Shengen, si dhe diversifikimin e energjisë.Presidenti Radev theksoi se ekonomia e fortë, shoqëria e begatë dhe media e lirë mund të ndërtohen vetëm mbi sundimin e ligjit dhe kjo kërkon që lufta kundër korrupsionit të mos jetë subjekt i konsideratave politike apo të tjera.

Gjatë vizitës së ambasadorit O'Brien janë planifikuar takime me përfaqësues të qeverisë bullgare dhe me anëtarë të komunitetit ndërkombëtar të biznesit. Temat e bisedimeve të ambasadorit O'Brien kanë të bëjnë me promovimin e një mjedisi transparent dhe të favorshëm biznesi, mbështetjen e investimeve të huaja direkte dhe forcimin e shtetit ligjor.

Është planifikuar që diplomati i lartë amerikan të vizitojë edhe një event të organizuar nga Dhoma Amerikane e Tregtisë me pjesëmarrjen e Dhomës së Tregtisë Gjermane dhe Zvicerane, kushtuar forcimit të marrëdhënieve të biznesit transatlantik.