Darko Anaçkov: Ne po punojmë për të kapërcyer paragjykimet ndaj bullgarëve në Serbi

botuar më 25-03-10 7.30.PD

Darko Anaçkov

Foto: Arkiva personale

Një hap përpara, dy mbrapa - i tillë është hapi i vallëzimit të marrëdhënieve bullgaro-serbe sipas Darko Anaçkov, kryetar i organizatës së vetme bullgare në qytetin e Vranjës. Në një intervistë për Radio Bullgarinë, ai e cilësoi nivelin aktual të marrëdhënieve dypalëshe si të pakënaqshëm dhe theksoi se ka nevojë për bisedime serioze për zgjidhjen e problemeve të rëndësishme të bullgarëve në Serbi. Sipas tij, organizatat e bashkatdhetarëve të fqinjit tonë perëndimor mund të jenë nismëtare të bisedimeve, por duhet të ketë vullnet nga të dyja vendet për të shtruar në tavolinë problemet - ekonomike, si dhe ato që lidhen me të drejtat e minoritetit bullgar.

Qyteti jugor serb i Vranjës ndodhet gati 150 kilometra nga Sofja. Është një nga qendrat kryesore të rajonit të Moravisë, me një popullsi prej mbi 70 mijë njerëz. Aty prej tetë vitesh funksionon një Qendër bullgaro-serbe, iniciativat e së cilës kryesisht kanë për qëllim prezantimin e Bullgarisë tek të rinjtë.

“Qendra bullgaro-serbe në Vranjë ekziston që nga viti 2018 dhe i është përkushtuar ruajtjes së identitetit kombëtar të bullgarëve në këtë qytet”, thotë kryetari i saj Darko Anaçkov, duke saktësuar: “Sipas regjistrimit zyrtar, rreth 600 persona që i përkasin pakicës kombëtare bullgare jetojnë në qytet, por ky numër është dukshëm më i lartë, pasi një pjesë e madhe e njerëzve janë nga martesat e përziera, por fatkeqësisht ka edhe nga ata që për arsye të njohura fshehin origjinën e tyre bullgare. Kemi anëtarë të rinj çdo vit – njerëz që paguajnë shumën vjetore për anëtarësim dhe për ta ky është një nder”.

Ka 35 anëtarë zyrtarë të Qendrës, por shumë më tepër njerëz janë të përfshirë në aktivitetet dhe ngjarjet e saj, më e fundit prej të cilave është një punëtori veroresh për fëmijë.

"Ne zbatojmë shumë iniciativa me fëmijët nga qyteti i Vranjës, sepse duam që ata të mësojnë bullgarisht, të njohin traditën dhe historinë e të parëve të tyre. Dhe tani për tani nuk ka zgjidhje tjetër - nuk kemi shkollë bullgare, nuk kemi as përkthyes bullgar", na thotë Anaçkov.

Pothuajse të gjitha projektet e Qendrës bullgaro-serbe mbështeten nga Ministria e Punëve të Jashtme të Bullgarisë dhe Konsullata e Përgjithshme e vendit tonë në Nish.

Sipas statistikave jozyrtare, në Vranjë ka afro 2-3 mijë bullgarë, na thotë Darko Anaçkov, por shumë prej tyre nuk e njohin mirë gjuhën bullgare, disa nuk e flasin fare. “Duhet të punohet me këta njerëz për të kompensuar kohën e humbur”, thotë kryetari i Qendrës Bullgaro-Serbe, e cila ka një sërë iniciativash për të përmirësuar njohuritë e gjuhës bullgare tek bashkatdhetarët tanë në këtë pjesë të Serbisë:

"Ne kemi një bibliotekë në shoqatë. Falë Konsullatës së Përgjithshme, Fondacionit "13 Shekuj Bullgaria" dhe organizatave të tjera gjetëm libra dhe vitin e kaluar zhvilluam 2 kurse të gjuhës bullgare. Organizojmë edhe kurse përgatitore për studentët e ardhshëm në Bullgari. Kështu, vitet e fundit ka një numër shumë më të madh studentësh që studiojnë në Bullgari më anë të Urdhrit 103 të Këshillit të Ministrave me interes të madh për teknologjitë mjekësore dhe teknologjinë infromatike".

Përveç bullgarëve etnikë, iniciativat e Qendrës bullgaro-serbe janë gjerësisht të hapura për të gjithë banorët e Vranjës.

"Ne si shoqatë punojmë edhe për qytetarët serbë, sepse besojmë se ka nevojë që ata të njihen më shumë me traditat e Bullgarisë si një vend me kulturë të pasur evropiane. Sepse ju e dini që në Serbi ka disa paragjykime që lidhen me bullgarët. Dhe ne si Qendër bullgaro-serbe kemi detyrë, nëse mund të them kështu, ta ndryshojmë këtë pamje, këtë mendim për Bullgarinë në Serbi."

Foto: Qendra bullgaro-serbe në Vranjë, glaspress.rs, Dr. Radostina Stojanova, arkiva personale

Përgatiti në shqip dhe publikoi: Kostandina Bello

Последвайте ни и в Google News Showcase, за да научите най-важното от деня!

Ndaje

Darko Anaçkov: Ne po punojmë për të kapërcyer paragjykimet ndaj bullgarëve në Serbi

Më shumë nga rubrika

Fshati Trigrad është mikpritës i Tubimit Kombëtar të Qenit Karakaçan

Nisma "Tavolina e Madhe: Një komunitet" për herë të fundit këtë vit

Nënpresidentja Ilijana Jotova është te bullgarët në Moldavi

Interes rekord për programin "Unë Zgjedh Bullgarinë" të drejtuar për bullgarët jashtë vendit

Gazetari Hristo Grozev në Berlin: Çmimi evropian vërteton se vitet e mundimit ia vlejnë

Popullsia e lejlekëve të bardhë është rritur me një të tretën