Turizmi është një nga sektorët në vendin tonë që është më i gatshëm për të vazhduar punën pa probleme pas hyrjes së Bullgarisë në eurozonë - është e bindur drejtoresha ekzekutive e Bordit Kombëtar të Turizmit, Dr. Polina Karastojanova. Në turizëm, edhe në këtë moment, pjesa më e madhe e çmimeve - për hotele, shërbime, udhëtime - ofrohet nga operatorët turistikë në euro, pasi ata punojnë me të dyja monedhat, siç e kërkon ligji. “Një rritje çmimi mund të ndodhë vetëm si funksion i ndryshimit të çmimeve të të gjitha furnizimeve, shërbimeve, mallrave dhe elementëve që formojnë produktin turistik”, shtoi ajo. Gjatë një diskutimi të veçantë mbi këtë temë në Sofje, përfaqësues të biznesit dhe ekspertët shpjeguan hapat dhe ndryshimet e ardhshme që vendi ynë duhet të ndërmarrë për të qenë plotësisht gati për t'u bashkuar me eurozonën më 1 janar 2026.
Në lidhje me hapin e ardhshëm të rëndësishëm për vendin tonë, përfaqësues të sektorit të turizmit formuluan 10 pyetje konkrete ndaj institucioneve përgjegjëse në vendin tonë. Shumë prej tyre tashmë e kanë përgjigjen në Ligjin e Adoptimit të Euros, si dhe në faqen e informacionit.
"Në Bullgari kemi luksin që të kemi mbështetje për euron mbi 40% praktikisht pa një fushatë informuese", tha Stanisllav Popdonçev, zëvendëskryetar i Dhomës Industriale Bullgare.Sidoqoftë, bizneset janë të interesuara për datën konkrete të anëtarësimit në eurozonë, pasi kjo është thelbësore për vendosjen e softuerit me të cilin punojnë:
"Data e saktë se kur do të vihet euro në shfrytëzim do ta zbulojmë ndoshta në qershor. Duhet të dalin raportet e konvergjencës, të cilat shpresojmë të jenë pozitive, pas së cilës do të fillojnë një sërë takimesh të Këshillit të BE-së, i cili do të miratojë tri vendime. Njëra ka të bëjë me kursin e këmbimit, i cili nuk mund të përcaktohet pa pëlqimin e Bullgarisë. Vendimi i dytë lidhet me datën e vënies së euros në qarkullim, e cila zakonisht është në fillim të vitit të ardhshëm kalendarik. Kjo do të thotë se nëse data është 1 janari 2026, bizneset do të kenë rreth gjashtë muaj kohë për të përgatitur të gjitha proceset dhe softuerin e tyre për të punuar me euron” - shpjegoi Stanisllav Donçev.
Zëvendësministri i financave Metodi Metodiev dha garanci se nuk ka rrezik që kursi i euros të jetë i ndryshëm nga ai i dakorduar në disa vendime të Kuvendit Popullor, të miratuara me shumicë të cilësuar:
“Hapi i dytë është i ashtuquajturi qëndrim i vendit tonë në mekanizmin e kursit të këmbimit ERM2 dhe kërkesa për të qenë të paktën dy vjet aty. Ideja që qëndron pas këtij kushti është të shihet nëse ka ndonjë tension në lidhje me kursin e këmbimit gjatë kësaj periudhe dyvjeçare. Bullgaria, si një vend me Bord Monetar, në mënyrë të njëanshme ka deklaruar se do t'i përmbahet një kursi fiks brenda bordit dhe duke qenë se jemi pjesë e mekanizmit të kursit të këmbimit prej më shumë se dy vitesh, bordi funksionon në mënyrë perfekte. Pra çdo spekulim që flitet për kursin është absolutisht i pabazë.”
Përsa i përket përgatitjes së administratës shtetërore për punën e saj me monedhën e re, zëvendësministri bëri të ditur se zbatimi i softuerit të nevojshëm po ecën me ritme të mira:
“Në mbledhjen e fundit të këshillit koordinues për përgatitjen e Bullgarisë për eurozonën, u raportua se 76% e organeve shtetërore, softueri i të cilave është në pronësi të shtetit, tashmë lidhën anekse të kontratave të tyre dhe ndërmorën veprime me furnitorët përkatës për të përshtatur softuerin e tyre. Shpresoj që në muajt e ardhshëm kjo përqindje të arrijë në njëqind.”
Në një intervistë për Radio Bullgarinë, kryetarja e Këshillit Ekonomik dhe Social të Republikës së Bullgarisë, Zornica Rusinova, theksoi se është e domosdoshme të niset shpejt një fushatë ndërgjegjësimi kombëtar në lidhje me procesin e zëvendësimit të levës me euron:
“Problemet kryesore për momentin lidhen me faktin se njerëzit nuk e kanë të qartë se cila do të jetë periudha e këmbimit të lirë të valutës. Ne rekomanduam që të ketë një periudhë mjaft të gjatë - rreth një vit - në të cilën çmimet tregohen si në leva ashtu edhe në euro, në mënyrë që njerëzit të mund të gjurmojnë nëse ka ndonjë ndryshim në çmim dhe të mund të dërgojnë sinjale, por edhe të mësohen me konvertimin e ardhshëm të monedhës.Është e rëndësishme që të kemi një periudhë të gjatë, aktualisht të planifikuar të jetë 6 mujore, në të cilën bankat dhe Posta Bullgare do të shkëmbejnë valutën pa tarifa.”
Përgatiti në shqip dhe publikoi: Svetllana Dimitrova
Foto: BTA, Pixabay
Kostoja e punës në Bashkimin Evropian në vitin 2024 ishte mesatarisht 33,5 euro në orë, dhe vetëm në vendet e eurozonës - mesatarisht 37,3 euro në orë. Kështu tregojnë të dhënat e fundit të Agjencisë Evropiane të Statistikave “Eurostat”. Kostot e..
Për të paktën dy vite të tjera, toka bujqësore në Bullgari do të vazhdojë të bëhet më e lirë. Të dhënat vijnë nga shoqata e pronarëve të tokave bujqësore në vendin tonë dhe tregojnë se tregu i tokës bujqësore në vendin tonë është shumë i..
Me 118 vota "pro", Asambleja Kombëtare zgjodhi kandidatin e GERB-SDS Simeon Djankov si Kryetar të Këshillit Fiskal. Anëtarë të këshillit u zgjodhën Desisllava Kallçeva - GERB-SDS, Atanas Atanasov - ITN, Bogomill Manov - BSP-E Majta e Bashkuar,..