Deanna Haag ka lindur në Klivland, në Ohajo të SHBA-së. Është rritur me ëndrra për aventura dhe horizonte të reja. Ka përfunduar specializimin në “Arte të Bukura” në kolegjin Wittenberg në Ohajo, por jeta e saj merr një drejtim të papritur. Në rininë e saj, amerikania është dalluar për bukurinë e jashtëzakonshme dhe madje ka marrë pjesë në konkursin “Miss America”. Por pasioni i saj i vërtetë janë letërsia dhe udhëtimet. Dhe fati i do të guximshmit. Prandaj e dërgon larg qytetit të saj të lindjes, përmes kontinentesh dhe shtetesh të ndryshme — një udhëtim jetësor që e çon deri në bregun e Detit të Zi.

Në vitin 2007 në qytetin e Varnës (Bullgaria Verilindore) fillon një kapitull i ri në historinë e Deannës. Sot ajo është pronare e lumtur e njërës prej librarive më artistike dhe më të vizituara në qytet.

"Jam amerikane, por kam jetuar në Londër për 15 vjet, kam kaluar edhe 5 vjet në Moskë dhe 3 vjet në Iran, por mund të them se preferoj Evropën Lindore. E di rusishten dhe kjo ishte një nga arsyet që erdha në Bullgari. Gjuha juaj, natyrisht, nuk është si rusishtja, por është e afërt. Pengesa gjuhësore dhe burokracia janë sfidat me të cilat përballem këtu. Por, si një person që ka jetuar në qytete të mëdha dhe të ngarkuara, Varna më jep atë qetësi që kërkoja" – ndan për Radio Bullgarinë Deanna Haag.

Libraria e Deannës është e rregulluar me rafte të larta, kënde të rehatshme për lexim me dritë të butë, të ngjashme me analogun e saj të famshëm parisien “Shakespeare dhe miq”. Ky cep i qetë në zemër të qytetit të ngarkuar bregdetar mirëpret rregullisht takime letrare dhe festa tematike me çaj. Ndonjëherë Deanna organizon lexim të përrallave për fëmijë në anglisht. Ndodh që klasa të tëra, të kalojnë pragun e saj për mësimet e letërsisë. Gjithçka ka filluar para 17 vitesh.

“Kur mbërrita për herë të parë në vitin 2007, konstatova që librat në anglisht këtu në treg ishin të rinj dhe të shtrenjtë – kujton Deanna. – Prandaj vendosa të porosis 10 mijë libra nga Mbretëria e Bashkuar, shumë prej të cilëve ishin të përdorur. Në fillim u përqendrova në shitjen e librave në anglisht, por me kalimin e kohës fillova të ofroj edhe libra në bullgarisht, rusisht, frëngjisht, gjermanisht, italisht dhe danisht, pasi përpiqem të siguroj shumëllojshmëri dhe të përfshij të gjitha gjuhët. 

Gjysma e klientëve të mi janë bullgarë. Këta janë njerëz që lexojnë lirshëm në anglisht ose që duan të përmirësojnë aftësitë e tyre gjuhësore. Shumë lexues bullgarë tregojnë interes për autorët klasikë. Kjo tregon se janë inteligjentë dhe kërkojnë letërsi me vlerë. Por librarinë e vizitojnë edhe të huaj – kryesisht turistë gjatë verës. Disa njerëz madje dhurojnë libra për librarinë” – thotë Deanna Haag. Dhe shton se për të, gëzimi më i madh është të shohë fytyrën e ndonjë vizitori që ndriçohet kur gjen një libër interesant.

Edhe sot e kësaj dite, amerikania kujton vitet më të frytshme të saj në Moskë gjatë Luftës së Ftohtë. Në kryeqytetin sovjetik, Deanna ishte pjesë e radios amerikane “Radio on the Seven Hills”. Më vonë punon si drejtoreshë reklame në “The Moscow Times”. Përvoja në kryeqytetin rus i jep asaj një kuptim të thellë për kulturën e Evropës Lindore. Ajo thotë se në Varna është ndodhur pothuajse rastësisht, por shpejt ka zbuluar se ky është vendi i duhur për të.

"Sepse unë jam nga ata amerikanë që kanë jetuar jashtë Amerikës dhe, siç përmenda, e dua Evropën Lindore. Prandaj vendosa të vij këtu – për shkak të Detit të Zi dhe për shkak të supës suaj të shijshme me pulë" – thotë me gjysmë shaka Deanna dhe shton: – "Imagjinoni, jetoj 10 minuta larg nga libraria ime, fare pranë detit! Ky është një luks që vështirë mund të gjendet në vende të tjera."

Lexoni më tepër nga arkivi i Radio Bullgarisë: 

• Një ish-ushtarak britanik i thur rima Bullgarisë

• Remy dhe Paul, krijojnë histori nga rëra, të frymëzuara nga jeta në Bullgari

• Jaap van Beelen dhe koleksioni i tij unik i qilimave të vjetër bullgarë

• Ljutenitsa, dhe tani byreku - Makiko dëshiron të imponojë një tjetër ushqim bullgar në Japoni

Foto: Arkivi i Deanna Haag