Nxënësja bullgare e klasës së njëmbëdhjetë, Aleksandra Atanasova, është mes 27 fituesve të konkursit të 18-të evropian të përkthimit për nxënësit e shkollave të mesme Juvenes Translatores, organizuar nga Drejtoria e Përgjithshme për Përkthime me Shkrim e Komisionit Evropian.

Në kuadër të konkursit, ku morën pjesë 3700 nxënës nga 730 shkolla në të gjithë Evropën, vajza bullgare përktheu një tekst të panjohur nga anglishtja. Çmimi do t'i dorëzohet nxënëses së shkollës së mesme gjuhësore "Prof. Dr. Asen Zllatarov" në Haskovo (Bullgaria Qendrore Jugore) sot në një ceremoni të veçantë në Bruksel. Fituesit nga të gjitha vendet do të kenë mundësinë të takojnë përkthyes në Komisionin Evropian dhe të shohin se si ata punojnë.

Aleksandra flet shtatë gjuhë të huaja në nivele të ndryshme, raporton gazeta "Az-buki". Kryesisht merret me gjuhën angleze dhe gjermane, të cilat i studion në klasë, si dhe me rusishten dhe turqishten. Krahas interesave të saj personale, ajo po përparon edhe me mësimin e gjuhës portugeze, japoneze dhe kineze, të cilat i studion vetë.