Dimitër Kokov jeton prej 25 vitesh në Portugali dhe e përkufizon veten si një personalitet polivalent. Në rolin e sipërmarrësit, ai ka themeluar disa kompani – mes tyre një për shërbime softuerike që punon me klientë nga e gjithë bota, si dhe një platformë për telemjekësi, e cila lidh disa nga mjekët më të mirë me pacientë në vende të ndryshme. Përveç kësaj, ai merr pjesë si këshilltar në European Health Parliament, ku jep opinionin e tij të specializuar mbi të ardhmen e shëndetësisë dixhitale në Evropë, dhe për të gjithë këtë aktivitet është vlerësuar me çmime prestigjioze ndërkombëtare.

Mbi të gjitha, qëndron historia familjare, në të cilën spikat violinisti i jashtëzakonshëm dhe një nga themeluesit e "Sofijski solisti" (Solistët e Sofjes) – Ivan Shamliev, pasionin muzikor të të cilit Dimitri e ka trashëguar.

"Një nga gjërat e para që mbaj mend në jetën time është si më vinte në gjumë nëna ime, ndërsa dëgjoja "Hard Luck Woman" nga KISS – kujton Dimitër Kokov. – Në moshën 3 vjeçare tashmë dija të vendosja kasetën dhe gjatë gjithë ditës dëgjoja grupin tim të preferuar, e kur mbusha pesë vjeç, imagjinoja që isha pjesë e tij dhe luaja para fansave. Edhe pse hyra me konkurs në shkollën e fëmijëve pranë shkollës muzikore në Sofje, luaja me detyrim. Rreth moshës shtatë vjeç, kisha ide në kokë për këngë të plota dhe i regjistroja duke i kënduar në kasetofon.

Dimitër Kokov tregon se IT-ja dhe telemjekësia shfaqen më vonë në jetën e tij, sepse së pari ai donte të bënte muzikën që kishte afër zemrës. Kur përfundoi shkollën, kuptoi se teknologjitë informative do të ndryshonin të ardhmen dhe u diplomua si inxhinier softueri në Portugali. Më pas erdhi në jetë edhe sipërmarrja. Ndërkohë ai krijoi softuer për Mayo Clinic – një nga spitalet më të mëdha në Shtetet e Bashkuara.

“Nuk kisha studiuar për mjek, as nuk kisha mundësi financiare, por doja shumë të ndërtoja një spital – rrëfen Dimitër Kokov. – Mendova si mund ta realizoja këtë ëndërr. Dhe duke parë një të ardhme të madhe në telemjekësi, praktikisht ndërtova një spital virtual me disa nga mjekët më të mirë në Portugali, të cilët edhe sot ndihmojnë pacientë në mbarë botën. Kjo ndodhi para shumë vitesh, kur konsultimet online ishin të çuditshme për pacientët dhe pothuajse ofenduese për mjekët. Me shumë punë dhe sakrifica arrita deri në vitin 2020, kur shpërtheu pandemia e Covid-19. Pacientët, mjekët dhe madje edhe investitorët ndryshuan shpejt mendim dhe kuptuan potencialin që unë gjithmonë e kam parë në telemjekësi – nga tani e tutje kjo është e ardhmja.”

Soul (shpirt) – Dimitër Kokov zgjodhi burimin e muzikës së tij si emër për albumin e tij, i cili do të jetë gati shumë shpejt. Vetë shkruan muzikën dhe tekstet e këngëve, vetë ekzekuton pjesët instrumentale dhe vokalet në studio-n e tij në Porto. Në platformat e streaming-ut, ku muzikanti prezantohet me emrin Dimitar, tashmë mund të dëgjohen single-t “Inevitable” dhe “Queen Of The Night”.

Dimitër Kokov shpreson që një ditë të bëjë koncert në atdheun e tij, me të cilin asnjëherë nuk ka ndërprerë lidhjen. Ai e tregon këtë duke i mësuar fëmijës së tij gjuhën bullgare, duke pasur shtëpinë e hapur për miqtë nga Bullgaria, duke u takuar në festa me bashkëkombës në Portugali dhe duke mos tradhtuar shijen bullgare, edhe në kuzhinë. Në fund, ai thotë me shprersë: “Nëse e kam bërë jetën e dikujt më të mirë përmes muzikës apo projekteve sipërmarrëse, për mua ky është vlerësimi dhe kënaqësia më e madhe.”