Gjatë javës së parë të muajit korrik 2025, në ambientet e Fakultetit të Gjuhëve të Huaja të Universitetit të Tiranës u zhvilluan me sukses katër ditët e para të edicionit të pestë të Shkollës Verore të Gjuhës Bullgare, një iniciativë unike në llojin e saj në Shqipëri. Kjo shkollë organizohet nga Fakulteti i Gjuhëve të Huaja dhe Departamenti i Gjuhëve Sllave-Ballkanike, në bashkëpunim me Universitetin “Shenjtorët Kirill dhe Metodij” të Veliko Tërnovos në Bullgari, në kuadër të bashkëpunimit ndërinstitucional midis dy universiteteve.

• Filloi Shkolla Verore e Gjuhës Bullgare në Tiranë

Aktivitetet nisën më 1 korrik 2025 me një ceremoni të veçantë në sallën “Europa” të Fakultetit të Gjuhëve të Huaja. Të pranishmit u përshëndetën sipas traditës bullgare – nga një studente e veshur me kostum popullor karakteristik bullgar dhe me kulaç të shoqëruar me mjaltë – si simbol i mikpritjes dhe fillimit të mbarë. Ceremonia u pasurua me urime nga përfaqësues të institucioneve akademike dhe diplomatike. 

Në ditët pasuese, mësimi i gjuhës praktike bullgare u zhvillua në dy nivele – fillestar dhe i avancuar – me pjesëmarrje të gjerë dhe ndërveprim të vazhdueshëm midis studentëve shqiptarë dhe atyre bullgarë që studiojnë gjuhën shqipe. Ky model inovativ i mësimdhënies ndërsjellë promovon jo vetëm përvetësimin e gjuhës, por edhe ndërtimin e urave ndërkulturore. Seminaret e gjuhës praktike u drejtuan nga pedagogët e bullgarishtes, Prof. As. Dr. Raqi Bello nga Universiteti “Shenjtorët Kirill dhe Metodij” i Veliko Tërnovos dhe lektorja e bullgarishtes në Universitetin e Tiranës, Dr. Miranda Bello.

• Prof. Asoc. Dr. Raqi Bello: Shqiptarët janë një popull tolerant dhe i vlerësojnë bullgarët