Pavell Balev është bullgari i parë që ka marrë pozitën e dirigjentit kryesor në një teatër opere në Francë. Ai ka deklaruar disa herë se kudo paraqitet si muzikant bullgar.

"Unë jam bullgar europian. Dhe mendoj se si bullgar europian, ose si europian bullgar, mund të tregoj më shumë dhe të zgjoj më shumë interes për diçka që mund ta tregojmë – nga këndvështrimi ynë, me zhvillimin tonë, me mentalitetin tonë, me edukimin dhe arsimimin tonë. Mendoj se aty fshihen avantazhet tona – sepse jemi të detyruar të luftojmë dhe të dëshmojmë vazhdimisht. Vetëm kur njeriu arrin vërtet të luftojë, mund të arrijë diçka, dhe këtë mund ta bëjmë vetëm me qëndrueshmërinë bullgare. Ky është mendimi im – unë luftoj si bullgar."

Pavell Balev ka lindur në Çirpan. Ka studiuar në Shkollën Muzikore të Stara Zagorës – qyteti i blinave dhe poetëve, i njohur për respektin ndaj arteve dhe dashurinë e veçantë për operën, si dhe për Festivalin e famshëm të artit operistik dhe baletit. Këtë vit ai do të dirigjojë trupën e Operës së Stara Zagorës në premierën e "Andrea Chénier" të Umberto Giordanos gjatë Festivalit – dhe ky në fakt do të jetë debutimi i tij në Stara Zagora. Një nga muzikantët bullgarë që interpreton shumë muzikë bullgare, Balev arriti të bindë yllin botëror Diana Damrau të këndojë lutjen e Maria Desisllavës nga opera me të njëjtin emër e Parashkev Haxhievit. Së fundmi ai përfshiu Suita Skandinave të Vladigerovit në një program koncertal me orkestrën e qytetit Suxhou në Kinë.

"Gjatë një kohe të gjatë nuk mendoja se isha mjaft i pjekur për të marrë këtë përgjegjësi për interpretimin e titujve bullgarë. Më duhej kohë. Procesi ishte i gjatë dhe i ndërlikuar, por unë preferoj të punoj veprat nga periudha gjermane e Vladigerovit, sepse atje ai është mjaft më klasik, hyn në korniza të bukura, arrin të përmbajë energjinë krijuese dhe ta stilizojë në shumë aspekte në atë mënyrë që të ketë sukses në Perëndim. Dhe mendoj se duhet ta paraqesim pikërisht me këtë universalitet evropian, që e gjej në opusët e tij të parë, të shkruara në Gjermani."

Publiku gjerman ka pëlqyer shumë edhe partiturën e Marin Goleminovit në interpretimin e tij – Variacionet mbi një temë të Dobri Hristovit. Ndërsa tani Balev ka një dëshirë të madhe të interpretojë vepra të Ljubomir Pipkovit, sepse "thelbi i tij muzikor është shumë, shumë i shprehur".

Në fund, kur pyetet për takimin më të rëndësishëm të jetës së tij, ai mendon për pak, por pastaj pohon me siguri se është takimi me bashkëshorten e tij. Muzikanti legjendar me të cilin do të donte të kalonte një mbrëmje është Mozart. E para gjë që i vjen në mend kur dëgjon fjalën Bullgari? " Nuk di si ta formuloj, por është një dashuri e pandërprerë, e dhimbshme… Mund të thuhet edhe 'dhimbja pa të cilën nuk mundem'."