Programi i ditës
Madhësia e tekstit
Radioja Kombëtare Bullgare © 2025 Të gjitha të drejtat janë të rezervuara

Një platformë e njohur italiane e udhëtimeve rekomandon ngrohtësisht Sofjen për në vjeshtë

Foto: Facebook/ Етюд-и-те на София

Klima e butë, ngjarje kulturore dhe mundësi për të njohur traditat vendase – këto janë vetëm disa nga arsyet pse vjeshta është koha më e përshtatshme për të vizituar Sofjen, raporton portali i njohur italian i udhëtimeve siviaggia.it, i cili së fundmi i kushtoi një artikull të gjerë kryeqytetit bullgar.

Sofja, kryeqyteti i Bullgarisë, është ndër ato qytete që dinë të befasojnë pa bujë të tepërt. Ajo nuk është një destinacion tipik "kartoline", dhe pikërisht në këtë qëndron edhe magjia e saj, sepse bashkon stile të ndryshme arkitekturore, rrugë të ngarkuara me histori dhe një atmosferë të gjallë që balancon mes shpirtit të Evropës Qendrore dhe ndikimeve orientale.

Dhe stina në të cilën qyteti shpalos më plotësisht magjinë e tij është, pa dyshim, vjeshta. Nga shtatori deri në nëntor, drita bëhet më e butë dhe më e ngrohtë, parqet vishen me nuanca të arta, dhe moti i këndshëm të fton të endesh nëpër rrugicat dhe sheshet e qytetit, të ndalesh në ndonjë kafene retro dhe të vëzhgosh jetën që rrjedh më ngadalë – shkruan autorja e artikullit, Flavia Cantini. Ajo shton se një tjetër pjesë e magjisë së Sofjes, gjatë kësaj periudhe, qëndron në mungesën e zhurmës dhe rrëmujës tipike të kulmit të verës.

Në shtator, temperaturat ditore zakonisht lëvizin nga 17 deri në 25°C, dhe drita kristalore u jep fotografive një efekt pothuajse pikturor. Kjo është një mundësi e shkëlqyer për të kombinuar turizmin kulturor me arratisje të shkurtra në natyrë, duke përfituar nga afërsia me malin Vitosha – vetëm disa kilometra larg nga qendra e qytetit, rekomandon autorja e shkrimit.

Lexoni më shumë për malin Vitosha: 

Temperatura të këndshme dhe më shumë kohë për shëtitje

Vjeshta në Sofje ju fton të ngadalësoni ritmin. Deri në mesin e tetorit, moti është i butë, bulevardet e rrethuara me pemë, oborret e fshehura dhe kupolat e arta të kishave ortodokse, ofrojnë një kënaqësi të vërtetë estetike. Përveç kësaj, mund të vizitoni në qetësi muzetë, galeritë dhe monumentet historike, pa radhët dhe turmat e zakonshme.

Në fund të tetorit, ajri bëhet më i freskët dhe më i pastër, ndërsa mëngjeset shpesh mbulohen nga një mjegull e lehtë, që i jep qytetit një atmosferë romantike, pothuajse përrallore. Nëntori sjell të ftohtit e parë të vërtetë, dhe herë pas here edhe borën e parë, duke e kthyer Sofjen në një destinacion më intim dhe të ngrohtë.

Stina më e mirë për ngjarje kulturore dhe kulinarie

Vjeshta në Sofje nuk është vetëm kohë për shëtitje në natyrë – është edhe sezoni kur kryeqyteti bullgar zgjohet me një program të pasur ngjarjesh kulturore dhe gastronomike në nivel ndërkombëtar. Veçanërisht nëntori është një muaj i mbushur me tundime kulinarie dhe festa të dedikuara ushqimit dhe traditave. Ekspozita si Salloni i Verës bashkon prodhues verërash nga gjithë rajoni, duke ofruar degustime dhe takime me ekspertë. Paralelisht me të, "Rruga e Qumështit" prezanton produktet e bulmetit – krenaria e kuzhinës bullgare, ndërsa Interfood & Drink sjell tendencat më të fundit gastronomike përmes stendave tematike, kuzhinave demonstrative dhe punëtorive praktike.

Këto ngjarje janë një mundësi e shkëlqyer për të shijuar specialitete tradicionale bullgare, si banica – një byrek i kripur me petë të holla dhe djathë, ose taratori – një supë e ftohtë me kos dhe kastravecë, të shoqëruara me verëra vendase që ende rrallë gjenden jashtë Bullgarisë, rekomandon autorja e artikullit. 


Vija e reajrore Torino – Sofje

Një arsye më shumë për udhëtarët italianë që të zgjedhin Sofjen pikërisht gjatë vjeshtës është edhe vija e re direkte ajrore e një kompanie të njohur ajrore me kosto të ulët nga Torino. Që nga data 28 tetor 2025, do të ketë tre fluturime në javë – të martave, të enjteve dhe të shtunave – duke ofruar një hyrje të re dhe të përshtatshme drejt një kryeqyteti që deri së fundmi kishte mbetur jashtë radarit turistik të shumë italianëve, raporton platforma italiane siviaggia.it https://siviaggia.it/idee-di-viaggio/sofia-bulgaria-autunno/549852/

Lexoni më shumë për kryeqytetin e Bullgarisë – Sofje nga arkivi ynë:


Përpiloi: Veneta Nikollova

Përgatiti në shqip dhe publikoi: Svetllana Dimitrova

Foto: Facebook/ Етюд-и-те на София / Sketches of Sofia, food-exhibitions.bg




Последвайте ни и в Google News Showcase, за да научите най-важното от деня!

Më shumë nga rubrika

Disa nga manastiret shkëmbore në zonë janë të arritshme për turistët

Lugina e murgjve – nëpër gjurmët e kishave shkëmbore në rajonin Pollomie

Në verilindje të Bullgarisë, lumi Rusenski Llom dhe degët e tij – Çerni, Beli dhe Mallki Llom – kanë skalitur një peizazh shkëmbor të ashpër me shpella të fshehura dhe lugina të qeta, ku jehon vetëm kënga e zogjve. Në këto kanione, gjatë shekujve, janë..

botuar më 25-10-07 7.50.PD
Biblioteka Nevena Kokanova në fshatin Iglika

Fshati prej guri Iglika ruan kujtimin për legjendën e kinemasë Nevena Kokanova

E quajnë “Foleja prej guri” e Ballkanit, për shkak të shtëpive dhe mureve të bukura prej guri, që qëndrojnë të qeta në përqafimin e malit. Në Iglika, jeta rrjedh qetë dhe pa zhurmë, larg rrëmujës së shekullit XXI. Vetëm rreth 15 kilometra larg..

botuar më 25-10-06 7.00.PD

Plovdiv me një atraksion të ri – një orë antike uji mat kohën në Sahat Tepe

Në majën e kodrës Sahat Tepe në Plovdiv , këto ditë u përurua një orë e lashtë uji – klepsidër, e rikonstruktuar sipas modeleve antike. Kjo është e vetmja orë e tillë e vendosur në ambient të hapur në Bullgari, dhe tashmë është atraksioni më i ri..

botuar më 25-10-05 7.10.PD