Më 14 shtator, Kisha Ortodokse Bullgare përkulet me nderim para Kryqit mbi të cilin u kryqëzua Jezu Krishti. Lartësimi i Kryqit të Nderuar të Zotit, (Krëstovden), është një nga 12 festat e mëdha të krishtera dhe gjithashtu një nga katër ditët në kalendarin ortodoks kur bëhet adhurim i posaçëm ndaj Kryqit të Zotit. Ditët e tjera janë: e Diela e tretë e Kreshmëve të Mëdha, e quajtur e Diela e Adhurimit të Kryqit, E premtja e madhe para Pashkëve, dhe 1 gushti.

Në historinë e krishterimit, kjo festë lidhet me tre ngjarje të rëndësishme kushtuar Kryqit Jetëdhënës. Këto janë Shfaqja mrekullibërëse e Kryqit të Shenjtë para perandorit Konstantin i Madhi në vitin 312, Gjetja e Kryqit në Golgotë në vitin 326 dhe Kthimi i tij nga robëria persiane në vitin 628.

Sipas shkrimeve kishtare, Shën Helena (Elena) – nëna e perandorit Konstantin i Madh, zbuloi Varrin e Zotit si edhe Kryqin e Krishtit. Mbi shpellën ku ndodhej varri, u ndërtua Kisha e Ringjalljes së Krishtit, e cila u shenjtërua në mënyrë madhështore më 13 shtator të vitit 335. Ditën pas saj, më 14 shtator, Kryqi u ngrit lart – u "lartësua" mbi kokat e besimtarëve, në mënyrë që të gjithë të mund të përkuleshin me nderim para tij. Që prej asaj dite, festa mori emrin Lartësimi i Kryqit të Shenjtë dhe Jetëdhënës të Zotit dhe është festë e të gjithë të krishterëve.

Më shumë për traditat dhe rëndësinë e festës mund të lexoni më botimet e Radio Bullgarisë mbi temën:

• Për Kryqin e Shenjtë dhe festën e tij

• Sot është Dita e Lartësimit të Kryqit të Nderuar!

• Lartësimi i Kryqit të Nderuar – besimi dhe traditat

• Nderojmë simbolin e fitores së Krishtit mbi vdekjen