Në nivel koalicioni, kemi vendosur të plotësojmë kërkesat e paraqitura nga mjekët e rinj në lidhje me nivelet e pagave, tha në një takim të Komisionit Parlamentar të Shëndetësisë kryetari i tij Kostadin Angellov, njoftoi gazetarja e BNR-së Milla Mlladenova.

Mjekët e rinj këmbëngulin që paga e tyre bazë bruto të jetë 3.5 herë më e lartë se minimumi për vendin, dhe që infermierët, rehabilituesit dhe asistentët e mjekëve të marrin 150% të pagës mesatare për vendin.

Pagat minimale të specialistëve mjekësorë në institucionet mjekësore do të përshkruhen në buxhetin e Fondit Kombëtar të Sigurimeve Shëndetësore dhe asnjë nga pagat nuk do të jetë më e ulët se propozimet në tre opsionet që Komisioni i Shëndetësisë duhej të diskutonte sot, shpjegoi deputeti. Sipas tij, pjesa tjetër e atyre që punojnë në sektorin e shëndetësisë do të marrin gjithashtu një rritje page.

Kostadin Angellov tha gjithashtu se buxheti i fondit të shëndetësisë do të rritet me 400 milionë leva (rreth 200 milionë euro) vitin e ardhshëm dhe do të arrijë rreth 10 miliardë leva (rreth 5 miliardë euro).

Redaktoi: Diana Cankova

Përgatiti në shqip dhe publikoi: Vesella Mançeva

Foto: BGNES