Tendenca në hartën demografike dhe etnike të Bullgarisë

botuar më 11-04-18 9.49.PD

Të dhënat e regjistrimit të fundit të popullsisë, megjithëse nuk janë përfundimtare, pohojnë disa tendenca negative – pakësimin e popullsisë, ndryshimet e shpejta në përbërjen etnike të kombit dhe shpopullimin e disa rajoneve. Këtë e thanë në një konferencë shtypi përfaqësues të Qendrës për politikën demografike. Sipas tyre është e nevojshme një politikë e posaçme që të kapërcehen këto probleme. Duhet të merren masa për nxitjen e lindshmërisë, për sigurimin e një standardi më të lartë të jetesës, për përmirësimin e cilësisë së shëndetësisë dhe arsimit bullgar dhe të bëhet një planifikim ekonomik për kapërcimin e shpopullimit të disa rajoneve të vendit. Shkencëtarët për herë të radhës alarmojnë për pakësimin progresiv të popullsisë bullgare. Sipas tyre faktorët kryesorë për këtë janë lindshmëria e ulët, nivelet relativisht të larta të vdekshmërisë së fëmijëve, përhapja gjithnjë e më e madhe e modelit të familjes më një fëmijë dhe pakësimi i vazhdueshmërisë së jetës, si edhe emigrimi i madh.

“Popullsia e Bullgarisë pakësohet vazhdimisht gjatë të 22 vjetëve të fundit – komentoi prof. Petër Slavejkov, dekan i Fakultetit të Gjeologjisë dhe Gjeografisë të Universitetit të Sofjes dhe anëtar i Qendrës për politikën demografike. Në qoftë se gjatë vitit 1988 ajo ishte afro 9 milionë veta, tani bullgarët janë rreth 7 milionë e 300 mijë veta. Bën përshtypje dhe tendenca e përqendrimit të popullsisë në disa qytete të mëdha. Bëhet fjalë për Sofjen, Plovdivin, Varnën, Burgasin dhe Blagoevgradin. Ky proces i rishpërndarjes së popullsisë është i pafavorshëm nga pikëpamja ekonomike, demografike dhe politike. Më shpejt pakësohet popullsia e Bullgarisë Veriperëndimore. Njëkohësisht ky rajon ka sipërfaqe të gjera dhe të favorshme për zhvillimin e bujqësisë, por nuk ka se kush t’i përpunojë. Prandaj nuk duhet të na habit fakti se sot mezi një e treta e frutave dhe perimeve që ofrohen në tregun tonë janë prodhuar në Bullgari.”

Prof. Petër Ivanov nga Qendra për politikën demografike shqetësohet nga tendencat e proceseve etnike në Bullgari. Sipas tij nuk ka një statistikë të saktë të numrit të njerëzve me kombësi të ndryshme nga ajo bullgare, por ai shtohet shpejt. Profesori pohon se vërehet një përqendrim i pafavorshëm i përfaqësuesve të kombësisë rome dhe asaj turke në disa rajone të vendit.

“Pandërprerë zhvillohen procese etnike – tha prof. Ivanov. – Kjo që na shqetëson është diferencimi – tendencat e ndarjes dhe veçimit të popullsisë në rajone të caktuara sipas parimit etnik. Nëse tendenca ekzistuese e pakësimit të numrit të popullsisë bullgare do të ruhet, parashikimet janë për një deformim të fortë të profilit etnik të vendit. Është e mundur që pas njëzet-tridhjetë vjetëve kombësia bullgare të jetë 50% prej tërë popullsisë së vendit.”

Përgatiti në shqip: Ekaterina Tarpomanova

По публикацията работи: Diana Hristakieva

Последвайте ни и в Google News Showcase, за да научите най-важното от деня!

Ndaje

Tendenca në hartën demografike dhe etnike të Bullgarisë

Më shumë nga rubrika

Vesella Rajçinova: Bullgarët gëzojnë një reputacion shumë të mirë në Izrael

Qytetet bullgare nisin garën për Kryeqytetin Evropian të Kulturës 2032

Në vitin 2024 bullgarët më të rinj janë nga Ukraina dhe Turqia

Komunitetet bullgare jashtë vendit janë ndër prioritetet në Programin e Menaxhimit të Qeverisë

Inteligjenca artificiale po krijon një realitet të ri për punëdhënësit dhe punëtorët

Shënojmë Ditën Botërore të Sëmundjeve të Rralla