Në Katedralen Metropolitane “Shën të Dielën” në kujtim të igumenit të Manastirit të Zografit, Arkimandrit Amvrosij, shërbehet meshë përkujtimore nga peshkopët e Kishës Ortodokse Bullgare. Pas një sëmundjeje të shkurtër, Hirësia e Tij  Amvrosij u largua nga kjo botë më 27 janar në Akademinë Mjekësore Ushtarake.

Igumeni i Manastirit të Zografit, me emrin laik Georgi Tjurolengov, lindi më 10 nëntor 1939 në fshat Novakovo, rajoni i qytetit Asenovgrad. Rrugën shpirtërore e filloi qysh fëmijë në Seminarin Teologjik të Sofjes në Stacionin Çerepish. Në vitin 1973 hyri si rishtar në Manastirin e Shenjtë të Baçkovos dhe katër vjet më vonë, në vitin 1977, pranoi murgjërinë. Katër vjet më vonë ai shkoi si murg në Manastirin e Zografit në Malin Athos dhe 16 vjet më vonë, më 21 prill 1997 u shugurua hierodhjak. Dy ditë më vonë u bë hieromurg dhe po atë ditë u fronëzua si igumen i Manastirit të Zografit.

Me bekimin e tij Manastiri i Zografit zhvillonte veprimtarinë e tij kulturore e arsimore, botonte qindra libra ortodoksë, jetëshkrime të shenjtorëve dhe botime për çështje aktuale dhe bashkëkohore.

Në kujtesën e kishës, Arkimandrit Amvrozij do të mbetet si një murg i zellshëm, një klerik i dhuruar nga Zoti dhe një këshilltar i mençur për shumë veta në rrugën e besimit. I dashur dhe i nderuar nga klerikët dhe laikët.

Në lidhje me vdekjen e tij presidenti Rumen Radev i shprehu mirënjohjen e thellë igumenit të Manastirit të Zografit: “Të gjithë ne humbëm një shërbëtor të zellshëm të Zotit dhe rojtar të Ortodoksisë, unitetit ortodoks dhe ndërgjegjes bullgare, një njeri i cili ia kushtoi jetën zhvillimit shpirtëror të Manastirit të Zografit dhe Malit Athos”, theksoi presidenti në fjalimin e ngushëllimit.

“Vdekja e igumenit të Manastirit të Zografit, Arkimandritit Amvrozij, është një humbje e madhe për spiritualitetin bullgar dhe për të gjithë ata që vlerësojnë dhe respektojnë trashëgiminë shpirtërore të Malit Athos”, thuhet në një mesazh në faqen e Këshillit të Ministrave në Facebook.