Në festimet e këtij viti në Romë do të marrë pjesë edhe Kori i Përzier i Radios Kombëtare Bullgare – një formacion profesionist me autoritet dhe histori të gjatë, që ka kënduar nën drejtimin e legjendave si Herbert von Karajan, Georges Pretre dhe Claudio Abado. Ftesa që kori të marrë pjesë në Liturgjinë e Shenjtë më 23 maj në bazilikën “San Klemente” është një nder për institucionin e Radios Kombëtare Bullgare. Në një intervistë të veçantë për Radion Bullgarinë, dirigjentja e korit – Ljubomira Aleksandrova – sqaron:

“Kjo ftesë erdhi nga Mitropoliti i Evropës Perëndimore dhe Qendrore Antonij dhe nga At Prof. Dr. Ivan Ivanov, përfaqësues i Kishës Ortodokse Bullgare në Romë. Që vitin e kaluar kishim biseduar për një pjesëmarrje të tillë të korit tonë dhe këtë vit do të realizohet, gjë për të cilën jemi shumë të emocionuar dhe të lumtur, sepse për herë të parë një pjesë e korit do të përballet me një sfidë të tillë – të marrë pjesë në një shërbesë në katedralen ‘San Klemente’.”

Për herë të parë në historinë ortodokse, Liturgjia e Shenjtë është kryer në altarin qendror të bazilikës antike në Romë, ku ruhen pjesë nga eshtrat e Shën Konstantin Kirill Filozofi, në vitin 2021, pikërisht nga prifti Ivan Ivanov. Ftesa e parë për pjesëmarrje të një kori profesionist në liturgji vjen në vitin 2025. A është kjo një sfidë për repertorin e këngëtarëve tanë?

“Është absolutisht një sfidë, sepse duhet të përshtatemi me një liturgji të cilën si formacion nuk e kemi realizuar më parë. Përgatitja jonë ka zgjatur tashmë tri javë. Sigurisht, me ndihmën e At Ivanovit, me ndihmën e kolegëve të mi që punojnë me kore kishtare. Sa i përket muzikës – kori jonë interpreton muzikë kishtare sllave. Para dy vitesh publikuam një disk me muzikë të tillë, pra kemi disa nga këto këngë në repertor, por asnjëherë nuk i kemi kënduar në radhën e plotë të një liturgjie. Është me të vërtetë një provë, një sfidë dhe një nder i madh për ne. Sidomos këtë vit që është shumë i veçantë për shtetin tonë: 1170 vjet nga krijimi i alfabetit bullgar, 1160 vjet nga pagëzimi i bullgarëve nga princi Boris I Pagëzuesi dhe 1140 vjet nga ndarja nga jeta e Shën Metodij. Përvjetorë shumë të veçantë që e sjellin akoma më shumë emocione.” — thotë Ljubomira Aleksandrova.

Në programin e këtij eventi prestigjioz janë përfshirë këngë të kompozitorëve bullgarë dhe rusë: Dobri Hristov, Çajkovski, Musorgski. Kohëzgjatja e muzikës është rreth 50 minuta. Sipas një tradite të hershme, më 24 maj delegacioni bullgar pritet nga Papa në Vatikan. "A janë ftuar muzikantët nga BNR në këtë pritje?"

“Ende nuk është përcaktuar kjo,” – thotë Ljubomira Aleksandrova, – “pasi kemi një papa të ri. Di me siguri që Mitropoliti Antonij dhe atë Ivan Ivanov janë në kontakt me Vatikanin për një mundësi të tillë dhe shpresojmë që të pranohemi. Ose, akoma më emocionuese do të ishte nëse ai (Papa) do të ishte i pranishëm në liturgji!”