Përmbytjet e radhës në bregdetin e Detit të Zi janë rezultat i ndërtimit të pakontrolluar, mjedisit natyror të shkatërruar dhe mosveprimit institucional, thuhet në një deklaratë nga Dhoma e Arkitektëve në Bullgari.

Sipas organizatës profesionale, ndërtimi i tepruar dhe shpesh i paligjshëm përgjatë bregdetit, përfshirë në përrenj dhe rrjedha ujore, është shkaku i drejtpërdrejtë i pasojave katastrofike. Ata theksojnë se shkatërrimi i dunave, hapësirave të gjelbra dhe sistemeve natyrore të drenazhimit e kthen çdo stuhi në fatkeqësi.

"Nuk mund ta injorojmë faktin se të gjitha këto ndërtime kanë marrë qëndrime pozitive nga Ministria e Mjedisit dhe Ujit, Ministria e Bujqësisë dhe Ushqimit dhe Agjencia Ekzekutive për Pylltarinë, edhe kur ato ndodhen në shtretërit e lumenjve dhe zonat me rrezik të lartë. Këtu duhet të theksojmë përgjegjësinë e madhe të të gjitha institucioneve në lidhje me këto rregullore, leje dhe kontrollin pasues mbi to", deklaron Dhoma.

Përmbytjet e sotme janë një paralajmërim: nëse nuk rivendosim arsyen, përgjegjësinë dhe etikën profesionale në planifikim, natyra do të vazhdojë të na mbajë përgjegjës për heshtjen tonë, paralajmëron organizata.

Shirat dhe përmbytjet e dendura në fillim të tetorit prekën një numër zonash në vend dhe morën katër jetë njerëzish në fshatin turistik Elenite, kujton BTA.

Lexoni më shumë në arkivin e Radio Bullgarisë:

• Pas përmbytjeve, Bullgaria kërkon ndihmë nga Fondi i Solidaritetit i BE-së

• Po rritet numri i viktimave të përmbytjeve në Elenite

Redaktoi: Diana Cankova

Përgatiti në shqip dhe publikoi: Vesella Mançeva

Foto: BTA